Ditën e sotme gazetari Basir Çollaku është pyetur rreth 30 minuta në Prokurori lidhur me dëshminë e nënkomisar Nuhut.
Sapo ka dalë nga Prokuroria e Krimeve të Rënda, Çollaku ka thënë për gazetarët se ai u pyet për mënyrën se si ishte realizuar intervista me oficerin që denoncoi rastin e Xhisiela Malokut.
Gazetari kërkoi që Prokuroria t’i shkojë deri në fund kësaj çështjeje.
“Isha thirrur nga prokuroria në cilësinë e personit që di për rrethana të dobishme për ngjarjen. Prokuroria t’i shkojë deri në fund, për të nxjerrë grupin armiqësor. Shpjegimet e mia kanë qenë rreth ngjarjes.
Prokurorët kanë kërkuar të dinë se cilat ka qenë mënyrë e intervistës, kontaktet me Nuhun, dhe si është bërë publikimi. Besoj se prokuroria do të jetë korrekte ashtu siç ishte gjatë kësaj seance. Do t’i isha mirënjohës prokurorisë t’i shkonte deri në fund çdo pretendimi politikanësh se mbase ata janë skenaristët e vërtetë”.
Çollaku i cili është paditur nga deputeti Balla, tha ndër të tjera:
“Unë jam që të kallëzohet kushdo që shpif, por nëse do ta fillonim, duhet ta nisim nga politikanët”.
