Kryetari i PD, Lulzim Basha tha se protestat do të vijojnë çdo ditë në rrugë dhe në sheshe, në çdo hapësirë institucionale. Nga selia blu në një deklaratë për mediat Basha u shpreh se ky është mesazhi i shpresës, fitorja e betejës së djeshme. Një ditë pas protestës së opozitës së bashkuar para Kryeministrisë, kryedemokrati theksoi se angazhimi do të vijojë deri në realizimin e krijimit të një qeverie antimafi.
“Mirënjohje për vërshimin popullor nga qindra mijëra qytetarët. I falënderoj të gjithë. Bashkimi është mesazhi i qartë, që shqiptarët nuk e pranojnë më këtë gjendje, bashkim gjigant vullnetesh, i tregoi botës që në Shqipëri ka dinjitet ka vlera dhe respekt për demokracinë dhe ligjin.
Ka një popull që e do drejtësinë e barabartë dhe lirinë. Mesazhi i protestës së djeshme është i qartë; shumica e refuzon qeverinë e bandave dhe drogës. Duam qeveri antimafia, zgjedhje të lira dhe të ndershme përmes reformës zgjedhore. Dita e djeshme është një betejë e fituar nga shqiptarët, që u ngritën mbi dallimet partiake. Ky ishte bashkimi më i madh në 27 vite për të refuzuar padrejtësinë.
Fitorja e kësaj beteje është një ogur i mirë për luftën e përditshme në të cilën është angazhuar opozita, ne do të vijojmë këtë luftë ditë për ditë, në rrugë dhe në sheshe, në çdo hapësirë institucionale. Shqipëria do të bëhet një vend evropian me drejtësi të barabartë për të gjithë. Ky është mesazhi i shpresës, fitorja e betejës së djeshme. Angazhimi do të vijojë deri në realizimin e krijimit të një qeverie antimafi“, deklaroi Basha.
