Pas helmimit të 26 zyrtarëve nga zarfet e ardhura me vota nga Serbia, Komisioni Qendror Zgjedhor zhvilloi një mbledhje të jashtëzakonshme.
Kryetarja e këtij komisioni, Valdete Daka tha se të gjitha zarfet që dyshohen për substanca të ndryshme do të qëndrojnë në objektin e Ministrisë së Infrastrukturës. Sa iu përket votave të tjera afër 15 mijë të diasporës, ajo u shpreh se do të dërgohen nesër në QNR.
“Votat që janë vlerësuar që kanë qenë në hapësirën e mbyllur, KQZ ka vendos që këto vota nesër nën përcjelljen e policisë të dërgohen në QNR meqenëse ato vota nuk janë objekt i hetimit…bëhet fjalë për 15 mijë e 500 zarfe që janë vlerësuar dhe verifikuar”, deklaroi Daka.
Ndër të tjera, kjo e fundit theksoi se pasi të kryhen hetimet dhe të bëhet vlerësimi i zarfeve të ardhura nga Sebia, nëse janë ose jo të rrezikshme, do të vazhdohet sipas procedurave.
“Këto zarfe që potencialisht dyshohen se ka ndonjë materie apo çka do qoftë do të mbesin në atë hapësirë që të hetohen nga policia dhe do të ekzaminohet forenzika. Ende nuk dihet asgjë sepse sapo ka filluar vlerësimi i tyre nuk ka arritur të bëhet asnjë punë, pasi të kryhen hetimet dhe vlerësohen a janë të rrezikshme për shëndetin e njerëzve pastaj do të vazhdohen sipas procedurave”, tha ajo, raporton KP.
