Ministri i Bujqësisë, Bledi Çuçi deklaroi se rreth 22 milionë euro do të investohen në sektorin bujqësor dhe zhvillimin rural në Shqipëri. Ndërsa sqaroi se kjo do të arrihet përmes dhjetëra kontratave të lidhura deri më tani në kuadër të programit IPARD.
Çuçi e cilësoi këtë një lajm të mirë për një vend si Shqipëria që përgjithësisht ka probleme me përthithjen e fondeve të donatorëve.
Ja si mund të përfitojnë fermerët grante nga programi IPARD 2
“Unë jam optimist që ne do të arrijmë të kapim të gjithë afatet përsa i përket mobilizimi të fondeve të kësaj skeme dhe nuk do të djegim asnjë fond që vjen nga Brukseli. Dua që të gjithë të kuptojnë se megjithë vështirësitë që ka përgjithësisht Shqipëria për thithjen e fondeve që vijnë nga donatorët, në këtë rast ne jemi një histori suksesi.
Kjo nuk është për të na vënë në gjumë, por për të na mbajtur zgjuar. Sepse shuma që duhet të shpenzojmë vitin tjetër duhet të jetë dyfish sa shuma e këtij viti”, tha ministri Çuçi.
Këto deklarata, Çuçi i bëri gjatë takimit të pestë të Komitetit të Monitorimit të Programit IPARD, takim i zhvilluar në Ministrinë e Bujqësisë dhe Zhvillimit Rural.
