Një vit pas çlirimit të vendit, Shqipëria mbajti zgjedhjet për Asamblenë Kombëtare, ku komunistët e bënë të qartë se do të ishin ata zotër të vendit.
Në zgjedhjet e 2 dhjetorit 1945, garuan vetëm kandidatë nën siglën e Frontit Demokratik, që ishte në thelb një ambalazh i Partisë Komuniste.
Balli, Legaliteti u përjashtuan si parti fashiste, ndërsa edhe rrymat e tjera politike alternative me komunistët, nuk u lejuan të marrin pjesë. Arsyetimi zyrtar:Një opozitë nga partitë rivale, do të degjeneronte në një reaksion fashist!
SHBA-ja dhe Britania e Madhe, i drejtuan një mesazh të qartë Enver Hoxhës:qeveria e tij do të njihej prej tyre, vetëm nëse do të mbante zgjedhje të lira dhe të ndershme.
Ato vetëm të tilla nuk ishin. Për shkak të shkallës së madhe të analfabetizmit, 73 vite më parë u votua me gogla që hidheshin në dy kuti:për kandidatët e Frontit, dhe për kundërshtarët e tij. Në mënyrë tinzare, fundi i kutisë së dytë ishte prej metali, në mënyrë që të dëgjohej gogla që binte në të.
Kështu pas përjashtimit të kundështarëve, komunistët identifikuan edhe votuesit që ishin kundër tyre.
Fronti Demokratik fitoi me 95 për qind të votave. Enver Hoxha iu përbetua gazetarëve perëndimorë, se fituesit përfaqësonin aspiratat e popullit.
Londra dhe Uashingtoni e denoncuan këtë farsë, dhe ndërprenë marrëdhëniet diplomatike. Duke pasur duart të lira, diktatori nisi asgjësimin fizik të opozitës, duke vrarë dhe burgosur qindra intelektualë.
