Eksperti i ekonomisë Vjoldi Danaj ka folur rreth koncesioneve të miratuara nga qeveria për dy akset, Milot-Balldren dhe Orikum-Llogara.
I ftuar në studion e Oran News, Danaj duke u bazuar në vlerat e publikuara të dy akseve, Milot-Balldren 296 milion euro dhe Orikum-Llogara 70 milion euro, u shpreh se nuk mund të ndërtojnë rrugë, kilometrat e së cilës nuk e justifikojnë vlerën,
“Sigurisht që është më shumë se e lartë. Nuk mund ne të ndërtojmë rrugë që ndoshta kilometrat nuk e justifikojnë të gjithë këtë vlerë. Është e vërtetë që ne kemi nevojë për rrugë të reja. Kemi nevojë që të shkurtojmë distancat dhe kohën lidhëse me një qytet dhe një tjetër. Por kjo nuk do të thotë që ne duhet të mbyllim sytë dhe të shfrytëzojmë në mënyrë maksimale dhe deri diku në mënyrë barbare të gjithë këtë pasuri që kemi”, tha Danaj.
Danaj deklaron se kostoja e këtyre rrugëve do të jetë sërish e qytetarëve dhe do të rëndojë në kurriz të tyre, duke shtuar se kur të përfundojnë rrugët do të vendoset edhe një tra që do të marrë taksën e përdorimit.
“Nuk mund të rëndojmë edhe më shumë qytetarët, sepse këto rrugë që po bëhen kostoja e tyre do të shkojë në kurriz të qytetarëve. Në momentin që do të përfundojnë rrugët do të vendoset edhe një tra që do ta marri atë taksën e përdorimit. Marrim shembullin e rrugës Orikum-Dukat, që do të jetë diku tek 17 kilometra ka pikun e përdorimit vetëm 3 muaj në verë. Pjesa tjetër është pothuajse e pa përdorueshme. Por kjo nuk do të thotë që edhe pse nuk do të përdoret nuk do të paguhet. Nuk do paguhet nga ata persona që nuk do ta përdorin, por ama shteti do të jetë i detyruar ta derdhi atë shumë që është bërë paraprakisht marrëveshja me koncesionarin. Këto janë marrëveshje që nuk janë bërë në të mirë të vendit, ndoshta nuk dua të mendoj që do ishin bërë me tendencë korruptive sepse do ishte shumë e rëndë. Por ndoshta studimi duhet të ishte më i thelluar, sepse pesha është sërish e popullit, e jona”, u shpreh Danaj.
