Tifo-grupi më i madh dhe i organizuar i kombëtares shqiptare “Tifozat Kuq e Zi” ka festuar 15 vjetorin e krijimit. Në këtë ditë të shënuar për ta, janë ftuar në një takim nga presidenti i Shqipërisë, Ilir Meta në institucionin që ai drejton. Kreu i shtetit me këtë rast postoi një mesazh, ku lartëson kontributin e tyre në suksesit e Shqipërisë në futboll.
“Tifozat Kuq e Zi” janë frymëzimi i Kombëtares sonë dhe pa dyshim “lojtari i 12-të” i saj. Me dashurinë e jashtëzakonshme për kombin, energjinë e pashtershme dhe qytetarinë e tyre, “Tifozat Kuq e Zi” e kanë lartësuar më së miri flamurin shqiptar në arenat sportive.
Motivim i jashtëzakonshëm për yjet e Kombëtares sonë dhe adrenalinë e paparë për zemrën e çdo shqiptari që rreh për ngjyrat kuq e zi.
Me rastin e 15-vjetorit të themelimit të këtij tifo-grupi, pata sot kënaqësinë të zhvilloja një takim të përzemërt me një përfaqësi të tyre, të cilët i falënderova për kontributin dhe i inkurajova të jenë përherë pranë Kombëtares në sfidat e radhës.”
