Në nisje të konferencës për shtyp, kryeministri Edi Rama ka folur për rastin e 11-vjeçarit shqiptar, Alvin Berisha, historia e të cilit u publikua nga emisioni “Le Iene”. I mituri ka mbetur në një Kamp në Siri. Edhe pse babai i tij arriti ta takonte të birin, nuk mundi ta merrte me vete në Itali, aty ku jeton prej vitesh.
Në fjalën e tij, Rama u shpreh se prej disa ditësh ka nxjerrë një urdhër të klasifikuar, të cilin nuk mund ta ndajë me publikun. Ndërsa deklaroi se po përgatitet një plan shpëtimi në bashkëpunim me partnerët ndërkombëtarë për të shpëtuar Alvin Berishën dhe qytetarët e tjerë shqiptarë që kanë mbetur në kampin e refugjatëve në Siri.
Ndër të tjera, shefi i qeverisë nënvizoi se situata është e komplikuar dhe nuk është një çështje që mund të zgjidhet me ndërhyrjen e ambasadës shqiptare.
“Pas 48 orësh pa gjumë jemi këtu për të ndarë opinionin tonë, por përpara se të hyjmë në temën e KiE-së dëshiroj që të ndaj me të gjithë një shpjegim, një shqetësim për kampin në Siri, për fat të keq ai emision drithërues sipas gjithë përshtypjeve të marra, unë nuk e kam ndjekur ka lënë të kuptohet se cështja e djalit të mitur është thjeshtë vullneti të ambasadës tonë në Turqi apo ambasadorit, por është e pavërtetë. E vërteta është që prej disa kohësh, unë kam nxjerrë një urdhër, i klasifikuar që nuk mund ta ndajmë me publikun lidhur me personat, familjet individët që gjenden në atë territor si pasojë e përfshirjes së burrave në një luftë për të tjerë në funksion të ISIS.
Shqetësimi unë ka qenë i lidhur me nevojën për aksesuar këto kampe, ku ka edhe një numër grash dhe fëmijësh. Në bashkëpunim me partnerët amerikanë kemi zhvilluar një proces të tërë identifikimi. Tërheqja e tyre nga ato kampe nuk bëhet as me ambasada dhe as me ambasadorë, pasi aksesi është i komplikuar dhe kërkon një koordinim me partnerët. Kemi rakorduar me partnerët tanë kryesorë. Kam komunikuar edhe me babain e djalit edhe i kam sqaruar se është një çështje që nuk varet nga ne, e strukturave tona diplomatike, pasi nuk bëhet fjalë për kampe refugjatësh të zakonshme. Natyrisht që gazetarët mund të hyjnë në këto kampe.
Situata tani atje është e komplikuar. Operacioni është i komplikuar dhe asnjë vend nuk ka bërë tërheqjet, madje as Italia ku u publikua rasti. Fokusi ynë ka qenë te gratë dhe të miturit dhe në bashkëpunim me partnerët kemi arritur që të grumbullojmë, jo pak informacion, kemi arritur të organizojmë kontakte dhe ka një plan për nxjerrjen e tyre nga kampet dhe është përgatitur e gjithë infrastruktura e nevojshme për transportimin e tyre dhe plan specifik masash për trajtimin e tyre më pas në Shqipëri. Por është një zonë ku ka autoritete”, tha Rama.
