Kosova është tronditur nga rrëmbimi i djalit 11-vjeçar në rrethinën e qytetit të Shtimes. Pasditen e djeshme, tre persona të maskuar e kanë futur me dhunë në një automjet xhip 11-vjeçarin me iniciale E.T nga komuna e Shtimes.
Me duar të lidhura, djalin e kanë dërguar disa kilometra larg shtëpisë së tij. Por pas disa orësh ai ka arritur që t’iu ikë personave. Për Gazetën Express, I miturin me lejen e familjarëve ka treguar gjithçka se si ndodhi për Gazetën Express.
Fëmija 11-vjeçar bashkë me djalin e xhaxhait Diartin, 18 vjeç, i cili kishte ardhur nga Belgjika pasditen e djeshme, kishin dalë për t’u shëtitur në rrethinën e qytetit të Shtimes. Ata kishin hyrë në një supermarket. Pas disa minutave ata dolën jashtë por në rrugën “14 dhjetori”, tre persona nga një makinë e tipit “xhip” e kishin thirrur E.T. në emër, duke e ftuar që të shkojë me ta.
I mituri kishte refuzuar që t’i përgjigjej kërkesës së tre personave. Disa minuta më vonë ata me maska në fytyrë, me dhunë e kishin marrë 11-vjeçarin dhe me duar të lidhura e kishin futur në veturë. Djali i xhaxhait të tij, nuk kishte arritur ta shpëtojë e as t’ua marrë targat e makinës së të dyshuarve.
“Dje rreth orës 19:30, nga një veturë e zezë një person ka thirrur emrin tim. Kur jam afruar për të parë, 3 persona me maska në fytyrë m’i kanë mbyllur sytë dhe gojën dhe më kanë futur në veturë”, rrëfen 11-vjeçari.
Ai thotë se nuk e di lokacionin se ku e kanë dërguar ata persona. Por që kujton se ka qenë një shtëpi e vjetër.
Të maskuar personat e kishin vënë 11-vjeçarin të lidhur në ulëset e pasme të veturës. Por vetëm disa orë pas, ai kishte arritur që ta shfrytëzojë mungesën e grabitësve dhe të ikë nga vendi. E gjithë ngjarja ka ndodhur mbrëmë rreth orës 23:30. I mituri tregon se gjatë gjithë kohës, rrëmbyesit i kishin thënë atij se nuk kanë punë me të por me prindin e tij.
“Unë kam ikë. Njërën dorë e kam liruar nga litari dhe kam ikë. Kur kam shkuar te hekurudha kam arritur që të gjejë policinë dhe zjarrfikësit”, thotë E. T, i cili është klasën e gjashtë. E disa orë pas rrëmbimit në telefonin e babait të tij, kishte shkuar një mesazh ku thuhet se rrëmbyesve do të duhej t’ua jepte 50 mijë euro në mënyrë që ai ta shohë djalin sërish.
Babai i E.T., Ademi, tha se nuk ka pasur ndonjë problem e as borxh me asnjë person. Andaj nuk e di se kush ia rrëmbeu djalin e as arsyet.
“Nuk kam pasur problem me askënd. Nuk kam ndonjë borxh”, thotë ai.
Megjithatë, 11-vjeçari ende është i shqetësuar nga e gjithë ngjarja. Familja në orët e pasdites së sotme e kanë dërguar atë për disa kontrolle mjekësore.
E për gjithë këtë punë, Policia e Kosovës po i vazhdon hetimet. Ende nuk ka asnjë të dyshuar për rrëmbimin e 11-vjeçarit.
