Komisioni Qendror i Zgjedhjeve në Kosovë ka marrë sot vendimin për rinumërimin e 115 kutive të votimit në 115 vendvotime, pasi nuk kanë mundur të procesohen si të rregullta për shkak të mospërputhjeve të të dhënave.
Koordinatori i Qendrës së Numërimit të Rezultateve, Burim Ahmetaj ka paraqitur para anëtarëve të KQZ-së raportin për formularët e rezultateve, të cilat nuk kanë mundur ta kalojnë auditimin, duke rekomanduar që për këto kuti të bëhet edhe një herë rinumërimi vetëm për atë subjekt që ka mospërputhje të të dhënave.
Ahmetaj tha se në këto kuti ka pasur mospërputhje të votave të kandidatëve të subjekteve me ato të kandidatëve, pasi në disa raste ka pasur subjekti më shumë vota se sa kandidatët, e disa tjera, kandidatët kanë pasur më shumë vota se subjekti.
Megjithatë, përfaqësuesi i PDK-së, në KQZ, Betim Gjoshi rekomandoi që të rinumërohen të gjitha pa përjashtim, pasi është më mirë për publikun.
Në mbledhjen e KQZ-së, koordinatori i QNR-së Burim Ahmetaj po ashtu ka prezantuar edhe raportin preliminar, ku janë dhënë arsyet e pavlefshmërisë së fletëvotimeve të 30 vendvotimeve që janë bërë dje.
Sipas këtij raporti, nga 518 fletëvotime të pavlefshme, 205 kanë qenë të shënjuara me shumë se një subjekt politik, 250 kanë qenë kur janë shënuar vetëm kandidatët, por nuk është shënuar subjekti politik dhe vetëm 62 kanë qenë fletëvotime të dëmtuara qëllimisht.
Anëtari i KQZ-së nga Vetëvendosje Adnan Rrustemi ka kërkuar mbledhjen e këtyre të dhënave nga secili vendvotim, në mënyrë që të shërbejnë për një analizë pas përfundimit të këtij procesi zgjedhor, shkruan KosovaPress.
Edhe anëtari i PDK-së në KQZ, Betim Gjoshi kërkoi që të mblidhen të gjitha rezultatet dhe të bëhet një analizë e mirëfilltë për numrin e madh të këtyre gabimeve, pasi shumë afër janë zgjedhjet lokale dhe duhet nxjerr mësime nga këto.
