Kryeministri Edi Rama tha sot se nuk ka fare rëndësi se çfarë thuhet por e rëndësishme është ajo që bëhet, duke folur mbi atë që u quajt përplasja me Haradinajn. Në një prononcim për Top Channel, Rama ka folur për marrëdhëniet mes dy vendeve, si dhe për debatet me homologun e tij kosovar. Rama ndër të tjera tha se nuk e ka problem kur të tjerët janë të drejt për drejtë kur flasin.
Më herët kryeministri i Kosovës, Ramush Haradinaj postoi një status të ashpër në Facebook kundër Ramës. “Edi Rama nuk ka çfarë të flasë për shpikjet politike në Kosovë! Le të merret me shpikjet e veta brenda Shqipërisë se i dalin boll” – shkruante Haradinaj. Kjo deklaratë e tij u pasua me një foto të postuar nga Rama në Facebook, ku dy kryeministrat trokisnin gotat.
I pyetur nëse e kapërceu ngërçin me Haradinajn, Rama përgjigjet: “Jo e kishim lënë darkën pas emisionit dhe nuk kishte asgjë për të sqaruar. Unë kam bindjen time, ai të vetën, nuk ka asnjë problem. Unë ashtu sikundër jam i drejtpërdrejtë kur flas, nuk e kam problem kur të tjerët janë të drejt për drejtë kur flasin. Nuk ka rëndësi fare, në fund fare se çfarë është thënë, rëndësi ka se çfarë do të bëhet. Unë uroj shumë që Ramushi do të bëjë gjënë e duhur dhe me kaq mbaron.”
