Punonjësi i Bashkisë, i cili u konfliktua ditën e sotme me një nga banorët e Mirëditës, do të procedohet në gjendje të lirë.
Ngjarja ndodhi paraditen e sotme, ku në prani të kryetarit të Bashkisë, Ndrec Dedaj, një nga punonjësit e tij i thyen telefonin një banori që të mos e lejojë të filmojë, veprim ky që ka sjellë përplasje fizike mes palëve.
Në ato momente ka ndërhyrë dhe ish-ministrja e Arsimit Lindita Nikolla, e cila është njëherësh dhe deputete në qarkun e Lezhës. Ajo e ka kapur prej krahu dhe është munduar që të qetësojë banorin.
Banorët po protestonin kundër ndërtimit të HEC-ve në lumin Uraka, si e vetmja pasuri që i ka mbetur zonës së Kurbneshit. Nga ndërtimi i këtij HEC-i rrezikonte të mbetej pa ujë të pijshëm fshati Lufaj, i njësisë administrative Selitë.
