Basha sot ka shpërblyer të gjithë politikanët besnik të tij. Përmes Këshillit Kombëtar që sot ka bërë votimin formal, kryedemokrati ka zgjedhur që në strukturat drejtuese të vendose emra që njihen për afrimitetin me të. Në mbledhjen e Këshillit janë konfirmuar në postin e nënkryetarit Edi Paloka dhe Edmond Spaho.
Ish-presidenti Bujar Nishani është zgjedhur Kryetar i Këshillit Kombëtar të Partisë Demokratike.
Po ashtu mësohet se Halim Kosova është zgjedhur Kryetar i Komisionit të Integritetit dhe Etikës.
Jemin Gjana është zgjedhur Kryetar i Komisionit Zgjedhor në PD.
Arben Ristani është zgjedhur si Kryetar i Komisionit të Apelimit, ndërsa Alfred Rushaj Kryetar i Bordit Financiar.
Rama ik/Bujar Nishani në krye të Këshillit Kombëtar të PD-së
Një ditë më parë, Basha kur bëri transparente emrat që do të votoheshin sot në Këshillin Kombëtar të PD, nuk përmëndi asnjë propozim për postin e sekretarit të Aksionit Qytetar në PD, që e mbante Ervin Salianji.
Basha vendosi ta shkrijë kështu këtë sekretariat, duke e lënë deputetin thjesht anëtar kryesie. Pavarësisht këtij vendimi, Salianji ka thënë jashtë ambienteve të selisë blu se ai do të luajë me zemër.
“Nuk ka rëndësi me top apo pa top, me intrigë, apo pa intrigë, unë luaj me zemër. Nuk kanë asnjë rëndësi funksionet drejtuese. Unë jam kandidat për Kryesinë e PD dhe anëtar i PD-së. Kjo nuk ndikon, unë do vazhdoj të punoj fuqishëm, por tani nuk ka rëndësi. Kjo vëmendja duhet të përqendrohet te protesta”, tha Salianji.
