Shqipëria ka gjetur kundërshtarin që do të përballet në miqësoren e vetme që do të zhvillohet në nëntor. Do të jetë Turqia kundërshtari i vetëm dhe miqësorja do të zhvillohet në Antalia në 13 nëntor. Do të jetë vetëm një ndeshje që do të zhvillojë kombëtarja shqiptare këtë nëntor, pasi kjo ka qenë edhe kërkesa e trajnerit Panucci. Përballjet mes këtyre dy kombëtareve në ndeshje zyrtare, janë zhvilluar vetëm në vitin 2005 në eliminatoret e Botërorit.
Komunikimi i plotë i FSHF:
Federata Shqiptare e Futbollit konfirmon zyrtarisht kundërshtarin për miqësoren e nëntorit për ekipin kombëtar. Kështu, skuadra përfaqësuese e futbollit do të luajë ndeshjen miqësore me ekipin kombëtar të Turqisë në Antalia, në datën 13 nëntor. Duke ju përmbajtur edhe kërkesave të trajnerit Christian Panucci për të patur vetëm një ndeshje miqësore në këtë periudhë, u arrit edhe marrëveshja përkatëse. Tashmë mes dy federatave është gjetur akordi përfundimtar dhe zyrtarisht FSHF konfirmon zhvillimin e miqësores me skuadrën përfaqësuesen të Turqisë. Trajneri Christian Panucci do të grumbullojë ditë përpara skuadrën për përgatitjen e kësaj ndeshjeje miqësore, e cila do të jetë e vetmja për muajin nëntor. Shqipëria kthehet të luajë përsëri pas disa vitesh një miqësore me kombëtaren e Turqisë. Ballafaqimet zyrtare me Turqinë i përkasin vitit 2005, në eleminatoret për Kampionatin Botëror. Në ballafaqimet mes dy skuadrave, Shqipëria dhe Turqia janë ndeshur 9 herë së bashku, me bilancin 3 fitore, 2 barazime dhe 4 humbje.
