Humbja e Udineses përballë Cagliarit me rezultatin 1-0, rezultoi fatale për trajnerin e bardhezinjve, Luigi Del Nerin i cili u shkarkua pas përfundimit të ndeshjes. Por ekipi sot ka zyrtarizuar edhe trajnerin e ri që do ta zëvendësojë atë dhe ai është Massimo Oddo.
Del Neri në 12 javë ë drejtim të Udineses këtë sezon ka arritur të marrë po aq pikë dhe ndodhet në vendin e 14. Katër fitore dhe 8 humbje janë cilësuar si fatale për teknikun që u shkarkua dy ditë më parë. Ndërsa Oddo vjen me premtimin se Udine nuk do ta diskutojë mbijetesën, por do të rikthehet më e fortë dhe do të arrijë të marrë rezultate bindëse. Po ashtu ai do të ketë edhe një sfidë me veten, pasi është cilësuar si fitues në Serie B dhe humbës në Serie A.
“Objektivi primar është të qëndrojmë në Serinë A, por mendoj se kjo është e padiskutueshme. Shoqëria më ka kërkuar që të punoj shumë dhe të çoj emrin e Udineses aty ku i takon. Është një ambient shumë simpatik, ku do të kem mundësinë të heq epitetin e një trajneri që fiton në Serinë B dhe humbet në Serinë A. Keqardhje për Del Nerin, por futbolli kështu funksionon dhe puna jonë lidhet ngushtësisht me rezultatet”, tha trajneri i ri i Udineses.
