Gugash Magani ka gjetur menjëherë ekipin që do të stërvitë në fazën e dytë të sezonit. Tashmë është zyrtare, trajneri peqinas do të punojë në Superligën e Kosovës, tek Trepçe 89. Një komkurencë mes trajnerësh shqiptarë do të zhvillohet edhe në kampionatin kosovarë, pasi aty drejtojnë edhe Hasan Lika dhe Blendi Shkëmbi. Magani do të punojë bashkë me Sabit Osmanin, Klodian Dervishin dhe Enver Salihun.
Presidenti Abedim Zeka pritet të mbyllë shumë shpejt çështjen e akomodimit gjatë fazës përgatitore të janarit, që do të zhvillohet në Turqi, ndërsa në ditët në vijim do të bëhen të ditur edhe emra e kundërshtarë në miqësoret që do të zhvillohen në Antalia. Trepça ’89 synon të mbrojë titullin kampion me Maganin trajner, ndërsa aktualisht ndodhet ne vendin e 7-të me 27 pikë, 7 më pak se Llapi kryesues.
