Mund të quhet transferimi i shekullit, pavarësisht zërave të shumtë dhe konfirmimeve të njëpasnjëshme askush nuk e besonte se do të ndodhte vërtetë. Cristiano Ronaldo është lojtarë i Juventusit. Kjo e martë ishte dita vendimtare për të sheshuar edhe detajet e fundit të tratativës së bujshme, që do të çojë kapitenin e kombëtares portugeze në Torino për 105 milionë euro.
Transferimin e Cristiano Ronaldos tani e zyrtarizon edhe Juventus përmes rrjeteve sociale. Bardhezinjtë kanë konfirmuar se marrëveshja në total do të kushtojë 100 milionë euro. Ja çfarë shkruhet në komunikatën zyrtare të klubit:
“Ai quhet Cristiano Ronaldo dhe ai është zyrtarisht lojtar i Juventusit. Juventus konfirmon se pesë-herë fituesi i Topit të Artë ka nënshkruar për klubin në një kontratë katër-vjeçare deri më 30 qershor 2022.”
Udhëtimi i presidentit të Juventusit në Kallamata, aty ku Ronaldo ndodhet me pushime prej ditësh, ishte vendimtar për ecurinë e negociatave, që bindën edhe agjentin e futbollistit Jorge Mendes. Ky i fundit, që ndodhet pranë lojtarit në resortin grek të Costa Navarinos, do të marrë rreth 25 milionë euro komision.
I shtyrë nga pakënaqësitë me drejtuesit dhe oferta e majme financiare, Ronaldo vendos të provojë një aventurë të re në Itali. Më kot u tentua në orët e fundit një telefonatë mes trajnerit Lopetegui dhe lojtarit portugez, që ritheksoi dëshirën për t’u larguar nga Reali, madje pa asnjë ceremoni lamtumire.
