Zv/presidenti i SHBA-ve, Mike Pence ka shtyrë vizitën e tij në Egjipt dhe në Izrael.
Vizita ishte parashikuar për këtë javë, por zyra e Pence njoftoi shtyrjen e udhëtimit për të siguruar kalimin në Senat të reformës gjithëpërfshirëse të taksave, kështu që ai do të duhet të qëndrojë në Uashington, duke shtyrë vizitën në Lindjen e Mesme.
Pritet që ky udhëtim i zotit Pence të realizohet në muajin janar.
Ndërkohë, nga ana tjetër, presidenti i Autoritetit Palestinez, Mahmud Abbas, e ka anuluar takimin e tij të planifikuar me zotin Pence pas shpalljes për Jerusalemin, më herët këtë muaj.
Takimin me Pence e kanë anuluar edhe klerikët e lartë myslimanë dhe koptët e krishterë në Egjipt.
Njohja e Jerusalemit si kryeqytet i Izraelit ka shkaktuar trazira, duke lënë të izoluar SHBA-në pas këtij vendimi, teksa të gjithë liderët i janë kundërvënë.
Mbrëmë, Shtetet e Bashkuara kanë paraqitur veto ndaj një propozim-rezolute të Këshillit të Sigurimit të Kombeve të Bashkuara, me të cilën refuzohej vendimi i Trumpit.
Anëtarët e tjerë të këshillit votuan në favor të propozimit, që ishte paraqitur nga Egjipti.
