Qëllimi për një proces zgjedhor të ndershëm, me standarde e të pakontestuar, ka bërë bashkë në një takim sot zv/kryeministren, Ledina Mandija me Prokurorin e Përgjithshëm Adriatik Llalla.
Sipas zyrës për shtyp të Kryeministrisë, të dy bashkëbiseduesit folën për bashkëpunim maksimal në ndjekjen me përparësi dhe hetimin e rasteve abuzive, të cilat dëmtojnë procesin e zgjedhjeve të lira dhe të ndershme.
Numri dy i Qeverisë, ka kërkuar një marrëveshje bashkëpunimi ndërinstitucionale mes Këshillit të Ministrave, Prokurorisë, Komisionit Qendror të Zgjedhjeve dhe Komisionerit për Mbikëqyrjen e Shërbimit Civil.
Gjatë bashkëbisedimit, zv/kryeministrja teknike nënvizoi rëndësinë e rolit të organit të Prokurorisë, në hetimin e rasteve të përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për vitin 2017.
Ajo i kërkoi Prokurorit në mënyrë specifike që të hetohet në drejtim të rasteve të përdorimit të burimeve të siguruara nga veprimtaritë e paligjshme.
Ndërsa Llalla ka shprehur vullnetin dhe angazhim maksimal si dhe është dakordësuar për formalizimin e një marrëveshje bashkëpunimi ndërinstitucional.
Më parë,Mandia ka realizuar takime edhe me Kryetarin e KQZ-së dhe Komisionerin e Mbikëqyrjes së Shërbimit Civil, me të cilët është rënë dakord për një marrëveshje bashkëpunimi ndërinstitucionale, e cila pritet të nënshkruhet së shpejti.
