Zëvendës Kryeministrja Sonida Mesi, ka qenë sot për inspektim të qytetin e Shkodrës, njëherësh dhe vendlindja e saj, për të parë nga afër zonat e përmbytyra në këtë qytete. 
“Jemi në gatishmëri të plotë për menaxhimin e situatës dhe bëjmë thirrje të gjithë aktorëve qendror e vendor, si edhe të gjithë komunitetit në Shkodër të bashkëpunojnë për të përballuar situatën kërcënuese nga përmbytjet”- është shprehur ajo.
Ndërsa, ka theksuar se: “Situata paraqitet e vështirë, mesatarisht kërcënuese, por jo kritike, dhe se Qeveria Shqiptare ka qenë dhe është plotësisht e angazhuar për tu ardhur në ndihmë banorëve”.
Më tej, Mesi falënderoi për punën me përkushtim gjatë kësaj situate emergjence strukturat operacionale të Ministrisë së Mbrojtjes, Forcat e Armatosura të Shqipërisë, Emergjencave Civile dhe të Policisë së Shtetit që janë në terren dhe në gatishmëri të plotë prej disa ditësh për tu ardhur në ndihmë të gjithë banorëve të prekur.
Mesi theksoi se: “Është e nevojshme që banorët të reagojnë për të parandaluar përkeqësimin e situatës përmes zhvendosjes së gjësë së gjallë apo orendive shtëpiake, si dhe duke iu drejtuar menjëherë për ndihmë forcave ushtarake, të policisë dhe të emergjencës përmes numrave 127, 128 dhe 129”.
Zëvendës Kryeministrja Mesi garantoi banorët se Qeveria Shqiptare do të marrë masat e nevojshme për evidentimin, vlerësimin dhe minimizimin e dëmeve të shkaktuara nga kjo fatkeqësi natyrore.
Në këtë moment, theksoi ajo, e rëndësishme është menaxhimi i situatës me sa më pak dëme dhe ardhja në ndihmë të menjëhershme për çdo banor dhe shpëtimi i çdo gjëje të gjallë.
“Sot erdhën 20 ton ushqime për gjënë e gjallë sipas kërkesës së komunitetit në këto zona. Ministria e Mbrojtjes po merr masat për blerjen e 107 ton ushqimeve për gjënë e gjallë për nevojat në vazhdim të zonave të përmbytura dhe ushqime dhe ujë të pijshëm”, shtoi Mesi.
