Ka nisur sot Maratona e Tiranës, nën kujdesin e Bashkisë së Tiranës dhe Federatës Shqiptare të Atletikës, së cilës i janë bashkuar më shumë se 2500 vrapues nga 40 vende të ndryshme të botës.
Garës i janë bashkuar shumë artistë, sportistë, por edhe politikanë.
Edhe kryebashkiaku Veliaj ka marrë pjesë në Maratonën në kategorinë 10 km, i cili përpara nisjes e konsideroi maratonën një ngjarje fantastike për kryeqytetin, ndërsa vlerësoi të gjitha strukturat që janë organizuar.
“Ka qenë një përgatitje fantastike. Shpresoj të dalë më mirë se vjet, megjithatë dua që gjithashtu t’i japim një duartrokitje atyre që s’janë këtu, por janë 660 vullnetarë, janë 400 policë, janë plot zjarrfikës, shërbimet emergjente, plot pastrues dhe mirëmbajtës që kanë bërë një punë fantastike”, deklaroi Veliaj.
Në përfundim të garës, vrapuesit, por edhe qytetarët do të kenë mundësi të ndjekin një sërë aktivitetesh të organizuara nga Bashkia e Tiranës, duke e kthyer këtë ditë në një festë për të gjithë.
