Referuar atentatit të ndodhur në Vlorë, nga ana e policisë janë sekuestruar pamjet e kamerave të sigurisë, por jo nga vendi i ngjarjes. Ato i përkasin bizneseve në rrugë. Në këtë formë, hetuesit janë të bindur se do mund të gjejnë lëvizjet e mjetit që përdoren autorët e krimit.
Shënjestra e atentatit të së dielës tek “Uji i Ftohtë” në Vlorë ishte Armando Sulejmani, i njohur me nofkën “Çipuri”. Ai i shpëtoi vdekjes pasi u shtri poshtë sediljes së makinës. Për fat të keq, në vendin e atentatit nuk kishte asnjë kamera sigurie.
Armando Sulejmani është i mbijetuari i vetëm i atentatit të së dielës në Vlorë, ku mbetën të vrarë Arjan Hasani dhe Orest Rexho. 43-vjeçarit i është komunikuar masa e arrestit në Spitalin e Vlorës, për akuzën e “armëmbajtjes pa leje”. Policia gjatë kontrollit të kryer ndaj të plagosurit ka gjetur një pistoletë, të cilën ai e mbante me vete.
Sulejmani i njohur me nofkën “Çipuri” ka marrë dy plumba, por që ndodhet jashtë rrezikut për jetën. Për ngjarjen e rëndë policia shoqëroi disa persona, të cilët janë lënë të lirë disa orë më vonë.
