Nëse nuk e keni bërë ende zhvendosjen e gjendjes civile në qytetin ku jetoni, atëherë keni edhe 19 ditë kohë, përndryshe do të gjobiteni.
Njoftimin e jep ministria e Brendshme, e cila ka njoftuar qytetarët edhe para 6 muajsh që të zhvendosin gjendjen civile aty ku jetojnë, në të kundërt do të gjobiten.
Kështu, afati i regjistrimit është deri më 28 korrik, ndërsa pas kësaj date, qytetarët që nuk përputhin vendbanimin me gjenden civile do të gjobiten me 10 mijë lekë të rinj.
Kjo shumë do i merret çdo qytetari në momentin kur ai të kërkojë certifikatë apo vërtetim lagje.
Megjithatë, duket se gjoba nuk është e vetmja masë, pasi Drejtori i gjendjes civile, Bledar Doracaj sqaron se kjo kategori do të ketë probleme me shërbimet si zyrat e gjendjes civile, me kartat e parkimit që do të vihen në funksion, por edhe me regjistrimin e fëmijëve në kopshte e shkolla.
Për çdo zhvendosje të vendbanimit dhe gjendjes civile, procedurat bëhen falas brenda 31 ditësh.
