Cristian Panucci si ç’kishte premtuar po vazhdon të ndjekë talentet shqiptarë dhe kosovarë që luajnë jashtë, nëpër kampionate të ndryshme. Së fundmi ftesa ka shkuar për talentin shqiptar të skuadrës belge, Genk, Edon Zhegrova. Për 18-vjeçarin nga Prishtina ka pasur interes edhe nga kombëtarja e Belgjikës, por duket se më konkrete dhe më bindëse ka qenë ftesa e kombëtares kuqezi.
Zhegrova ka folur ekskluzivisht për gazetën “Blic”, ku ka treguar edhe për ftesën që i ka ardhur nga tekniku italian, Cristian Panucci. “Kam marrë ftesë zyrtare nga Kombëtarja A e Shqipërisë për ndeshjen përballë Norvegjisë dhe jam shumë i lumtur, për këtë. Nga trajneri i kombëtares së Kosovës, akoma nuk kam marrë asnjë ftesë. Më ka kërkuar vetëm kombëtarja U-21. Këto ditë do të vendos përfundimisht për cilën kombëtare do të luaj”, tha Zhegrova.
Kështu pasi ka afruar Hajdareviçin, Qakën, Ahmedin, Balliun dhe Memollën, italiani ka piketuar një tjetër talentin Zhegrova dhe është duke vëzhguar shumë të tjerë.
