Drejtori i Përgjithshëm i Policisë së Shtetit, Muhamet Rrumbullaku ka mbërritur në Komisariatin e Policisë Sarandë për të parë nga afër punën hetimore dhe kërkimore që po bëhet për gjetjen e Leonard Theodhorit dhe Fatmir Sulovarit, të cilët janë kallëzuar si të humbur.
Rrumbullaku pritet të zhvillojë një analizë të detajuar të punës së kryer deri në këto momente, për të vendosur për mënyrën se si policia do të procedojë në vijim, mbi bazën e provave që ka mbledhur dhe administruar tashmë, me qëllim gjetjen e dy shtetasve. Pak më herët ka mbërritur në Sarandë edhe Drejtori i Policisë së Vlorës, Ermal Muça.
Po gjatë ditës së sotme,, Rrumbullaku është takuar me familjarët e tyre, ku i ka njohur me punën e pandërprerë hetimore dhe kërkimore të strukturave të Policisë së Shtetit, në bashkëpunim me agjencitë ligjzbatuese, për gjetjen e dy shtetasve. Ai i siguroi se hetimet dhe kërkimet për këtë rast do të thellohen akoma më shumë.
Prej 26 ditësh, dy 46-vjeçarët nga Saranda, Fatmir Sulovari dhe Leonard Theodhori janë zhdukur pa gjurmë.
Familjarët dhe policia vijojnë kontrollet në zonë, por pa rezultat, ndërsa ditën e sotme të afërmit te të zhdukurve kanë protestuar para Drejtorisë së Policisë në Tiranë, ku kanë kërkuar intensifikimin e kërkimeve nga ana e policisë.
