Kryetari i Komisionit Qendror të Zgjedhjeve, Klement Zguri u ka bërë thirrje numëruesve që të përfundojnë sa më parë procesin e numërimit.
Në një deklaratë për mediat, ai u ka kërkuar atyre që të numërojnë ccdo votë në mënyrë transparente dhe të shmangin çdo provokim apo përplasje me numëruesit e tjerë.
‘‘Në përmbyllje të afatit ligjor për shpalljen e rezultateve të votimit të zgjedhjeve të 25 qershorit, jam këtu për t’ju bërë thirrje të gjithë komisionerëve të Zonave të Administrimit Zgjedhor dhe anëtarëve të grupeve të numërimit të votave, të angazhohen për të mbyllur dhe tabeluar rezultatin e zgjedhjeve. Po ashtu, jam këtu për tu kujtuar se në këto zgjedhje ata kanë shansin të tregojnë se në Shqipëri mund të votohet e numërohet me profesionalizëm dhe në transparencë të plotë.
Komisionerët kanë shansin që në këto zgjedhje të sigurojnë një standard të ri, atë të përmbylljes së një procesi brenda afateve që parashikon ligji’’, u shpreh Zguri.
Zguri shpjegoi se ‘‘deri tani procesi i numërimit ka vijuar normalisht, me disa raste të ndërprerjes së numërimit për shkak të lodhjes së shfaqur nga ana e numëruesve apo ndonjë incidenti që është ndjekur hap pas hapi nga KQZ. Për çdo rast, KQZ ka treguar gatishmërinë për të ofruar zgjidhje dhe për të inkurajuar numërimin e votave’’.
Ndërsa shtoi se ‘‘përmbyllja e këtij procesi i shërben edhe vetë subjekteve në këtë garë elektorale’’.
