Qendërmbrojtësi i kombëtares shqiptare, Mërgim Mavraj pasi shkëputi kontratën me gjermanët e Hamburg mbeti pa ekip. Të shumta ishin skuadrat që treguan interes për shqiptarin nga Spanja dhe Italia, por që nuk gjetën akordin mes tyre, për shkak të rrogës së lartë që kërkonte Mavraj. Ai është grumbulluar nga trajneri Panucci për dy ndeshjet e Ligës së Kombeve me Izraelit dhe Skocinë.
Tashmë e ardhmja e tij është sqaruar dhe Mavraj do të bashkohet me grekët e Arisit të Selanikut, pasi ka arritur marrëveshjen për të nënshkruar një kontratë dy-vjeçare me klubin grek. Te skuadra greke Mavraj do të gjejë edhe shokun e tij të kombëtares Migjen Bashën i cili u bashkua me skuadrën e Selanikut një muaj më parë.
Lajmi për arritjen e marrëveshjes u konfirmua për mediat greke nga presidenti i Arisit të Selanikut Theodor Karipidis, i cili në profilin e tij zyrtar ka hedhur një foto të Mavrajt me klubin e tij të ri. Mbrojtësi ka firmosur tashmë kontratën me klubin grek dhe pas angazhimit me kombëtaren kuqezi do ti bashkohet skuadrës së tij të re.
250 mijë euro + bonuse do të përfitonte Mërgim Mavraj nëse do të pranonte fillimisht ofertën e Arisit. Lojtari i kombëtares nuk pranoi, pasi donte 350 mijë euro dhe u largua në drejtim të alternativave të reja. Opsione që nuk erdhën kurrë, pasi merkatoja ishte mbyllur në ligat kryesore dhe ekipet kishin plotësuar radhët. Mundësitë e Peruxhias dhe La Korunjës u dogjën dhe futbollisti mbeti në ajër.
