Pas përfundimit të zgjedhjeve të 11 majit, partitë politike janë rikthyer në pozicionet e tyre të zakonshme, me retorika përkatëse të fituesve dhe humbësve. Për opozitën, ky proces zgjedhor përbën një hap pas në rrugën drejt integrimit europian.
“Vetëm zgjedhje europiane nuk ishin, një mundësi e humbur. Këto zgjedhje, të konfirmuara edhe nga OSBE, treguan që jo vetëm nuk jemi gati, por ishin hapa pas në organizimin e proceseve zgjedhore. Nuk ka rëndësi sa grupkapituj hap, rëndësi ka sesi përmirësohen standardet. Më vjen keq që këtë mundësi të humbur Shqipëria e pati vetëm 1 vit pas hapjes së negociatave”, deklaroi Jorida Tabaku nga Partia Demokratike.
Ndërkohë, mazhoranca akuzon opozitën se po pengon integrimin europian për interesa politike. Kreu i grupit parlamentar të PS-së, Taulant Balla, deklaroi se Shqipëria është në rrugën e duhur dhe pritet të çelë të gjithë grupkapitujt brenda këtij muaji.
“Këto ishin zgjedhjet më të mira që ka zhvilluar Shqipëria. Të dalim nga retorika e njëjtë dhe individuale e një personi që nuk ka pranuar kurrë rezultat zgjedhjesh. Është e turpshme për partinë që ju përfaqësoni që dërgoni letra lart e poshtë ku kërkoni kushtëzimin apo bllokimin e negociatave me Shqipërinë për hallet personale të një personi që ka marrë peng partinë”, u shpreh Balla.
Ai iu referua rezolutës së miratuar nga organizata e partive të djathta IDC-CDI, e cila, me propozim të PD-së, kërkon që procesi i integrimit të kushtëzohet me “reforma konkrete zgjedhore”.
Diskutimet u zhvilluan në Komisionin për Çështjet Evropiane, ku u miratuan tre marrëveshje të lidhura me fondet e paraanëtarësimit nga Bashkimi Evropian. Megjithëse Sali Berisha ka premtuar mbështetje për çdo nismë që lidhet me integrimin, opozita nuk mori pjesë në votimin e këtyre fondeve në komisionin përkatës.
