Sot mbahen zgjedhjet për komunën e Tuzit në Mal të Zi, si komunë e pavarur nga Podgorica, pas fitimit të këtij statusi vitin e kaluar. Numërohen rreth 11.904 qytetarë të cilat kanë të drejtë vote.
Kryesues i listës së koalicionit shqiptar, Nik Gjeloshaj, në një lidhje telefonike për “News24”, deklaroi se përsa i takon rezultatit të zgjedhjeve, pret një fitore bindëse të shqiptarëve.
Nik Gjeloshaj kandidon përballë Mirza Pepiç të partisë së Milo Gjukanoviç.
Partitë shqiptare janë bashkuar në një koalicion me emrin “Malësia na bashkon”.
Deri më tani, zgjedhjet raportohen se po zhvillohen të qeta dhe pa incidente. Bëhet me dije se shumë emigrantë shqiptarë të larguar nga atje kanë shkuar në Tuz, për të votuar.
Këshilli Komunal i njohur si Parlamenti i Tuzit ka në total 32 anëtarë.
