Zgjedhjet kombëtare dhe rajonale në Indonezi, u zhvilluan për herë të parë bashkë me ato presidenciale, me synimin për të kursyer paratë.
Por, zyrtarët vendas janë shprehur se më shumë se 270 komisionerë kanë humbur jetën. Vdekja e komisionerëve ka ardhur kryesisht nga sëmundjet e lidhura me lodhjen e shkaktuar nga orët e gjata të punës teksa numëronin miliona fletë votimi me dorë.
Arief Priyo Susanto, zëdhënës i Komisionit të Përgjithshëm të Zgjedhjeve (KPU) u shpreh se 1878 vetë të tjerë janë sëmurë, ndërsa rreth shtatë milionë njerëz po ndihmonin të numërojnë dhe të monitorojnë votimin e 17 prillit.
Ministria e Shëndetësisë ka kërkuar që institucionet shëndetësore të tregojnë kujdes maksimal për të sëmurët, ndërkaq Ministria e Financave po punon për kompensimin e familjeve të komisionerëve që kanë ndërruar jetë.
