Delegatë të UEFAS vizituan sot Tiranën dhe kryen takim me kryeministrin Rama e presidentin e FSHF-së Armand Dukën. Kjo vizitë vjen për shkak të alarmit që ka krijuar ndërhyrja e një pale të tretë në këto zgjedhje për të përcaktuar fituesin, gjë që nuk është e lejueshme nga FIFA dhe UEFA. Kandidati për kreun e Federatës Shqiptare të Futbollit në 4 vitet e ardhshme, Bashkim Fino, ka akuzuar “Top Channel” për deformim lajmesh dhe mbështetje të kandidatit Duka.
Këtë konstatim Fino e ka bërë në deklaratën e zv.presidentit Surkis, i cili në asnjë moment nuk ka përmendur fjalën ndërhyrje të politikës në këto zgjedhje, por është shprehur për ndërhyrje të palës së tretë. Ndërsa “Top Channel” në kronikën e realizuar ka përmendur fjalën “politikë”, e cila është mungesë profesionalizmi për zotin Fino dhe akuzon se ka deformuar qëndrimin e ndërkombëtarëve.
Statusi i plotë i Bashkim Finos në Facebook:
Shtrembërimi i lajmeve nga “Top Channel”
Kam vënë re disa tendenca të mediave të ndryshme për të bërë rolin e tifozit në zgjedhjet për president të FSHF. Por, asnjëherë nuk kam dashur që të cënohet vërtetësia e lajmeve. Fatkeqësisht, në lajmet e “TOP CHANNEL” është deformuar deklarata e zv.presidentit të UEFA-s, zotit Surkis. Në radhë të parë përshëndetes qëndrimin e paanshëm dhe korrekt të UEFA-s. Në deklaratën e tij, zoti Surkis nuk e ka përmendur në asnjë moment fjalën politikë. Me dëshirën për të politizuar fushatën, kronika e “Top Channel” citon sikur ta ketë thënë zoti Surkis fjalën “politikë”. Keqardhje për mungesën e profesionalizmit.
