Një grup hakerësh kanë sulmuar emailet e kandidatit për president të Francës, Emanuele Macron.
Stafi i fushatës elektorale të Macron denoncoi sulmin kibernetik, pas rrjedhjes së një serë dokumentesh.
Sipas BBC-së, në mbrëmjen e vonë të së premtes janë postuar online një sasi e madhe e-mailesh të lidhura me fushatën e kandidatit për në Elize.
Sasia e dokumenteve arrin në 9 gigabyte të dhëna, të publikuara nga një përdorues që quhet EMLEAKS, në një platformë që përdoret për të shpërndarë dokumente në mënyrë anonime, “Pastebin”.
Pre e sulmit kanë qenë posta të ndryshme elektronike të disa përgjegjësve të fushatës elektorale të Macron.
Emailet origjinale u publikuan më pas bashkë me materialet e falsifikuara. Autorët e këtij veprimi “duket qartë që kanë dashur të minojnë fushatën pak orë pas balotazhit të dytë”, bën të ditur stafi i Macron.
Sulmi cilësohet si “një operacion që tenton destabilizimin e demokracisë siç u pa në Shtetet e Bashkuara gjatë fushatës elektorale”.
