Partia Konservatore e Theresa May nuk ka arritur të marrë shumicën parlamentare, edhe pse ka dalë partia e parë në Britani.
Kështu, për të formuar shumicën parlamentare, May duhej të fitonte të paktën 326 mandate, ndërsa partia e saj arriti të marrë 318 vende në parlament.
Laburistët e Corbyn kanë fituar 262 vende në parlament, kurse vendet e tjera janë marrë nga partitë e tjera, por asnjë nuk ka numrin e duhur për të formuar qeverinë dhe koalicioni do jetë ai që mund të vendosë qeverinë e re britanike.
Partia Konservatore e kryeministres May humbi mbi dhjetë vende në Parlament, krahasuar me parlamentin paraardhës, ku mes humbësve, ishin edhe pesë ministra të qeverisë May, të cilët nuk arritën të mbanin vendin e tyre në Parlament.
Ky rezultat përcaktohet si një poshtërim për kryeministren aktuale, Theresa May, e cila thirri këto zgjedhje për të forcuar pozitat e saj në bisedimet me BE-në, në lidhje me BREXIT.
