Në Austri zhvillohen sot zgjedhjet e parakohshme parlamentare, në të cilat ish-kancelari Sebastian Kurz kryeson sondazhet me 33-35 përqind. Gjasat janë që partia e tij të marrë më shumë vota se në zgjedhjet e fundit dhe mund të bëhet forca kryesore. Ndërsa FPÖ mund të marrë 21-23 përqind dhe duhet të luftojë me socialdemokratët, që në sondazhe renditen me 25-23 përqind. Ndërsa nga partitë e vogla, të Gjelbrit pritet të kapërcejnë pengesën e 4% dhe të futen në parlament, falë temës qendrore të ndryshimit të klimës.
Kurz i dha vetes imazhin e një djali të thjeshtë nga fshati dhe përmendte se kishte përkëdhelur me dëshirë dhitë tek gjyshërit në një zonë fshatare. Dikur, ai theksonte, si ishte rritur në një lagje punëtorësh në Vjenë. Por këtë herë bëhet fjalë për distancimin populist nga të ashtuquajturat elita. Slogani i fushatës zgjedhore të partisë së tij, ÖVP, ishte “Ne duam sërish kancelarin tonë!” dhe Austria me sa duket do atë që njeh dhe nuk do eksperimente.
Ndërkohë, skandali i ish-kryetarit të partisë, FPÖ, Heinz-Christian Strache, që i ofroi favore mbesës së një gjoja oligarku rus, nuk luajti rol parësor në fushatë.
Videoja e regjistruar në fshehtësi në Ibiza solli rrëzimin e koalicionit të konservatorëve me populistët nën kryesimin e Sebastian Kurz dhe kancelari u detyrua të largojë edhe ministrin e Brendshëm të FPÖ, Herbert Kickl. FPÖ u hakmorr duke kërkuar një mocion mosbesimi për kancelarin, gjë që solli rrëzimin e tij dhe hapi rrugën për zgjedhje të reja. Kundër ish-kryetarit të FPÖ-së, Heinz-Christian Strache, po zhvillohen hetime. Dyshohet se ai së bashku me gruan, sekretaren dhe truprojën e tij kanë keqpërdorur fonde dhe kanë marrë para nga oligarkë të dyshimtë nga Europa Lindore. Truproja e tij ka pranuar të flasë dhe madje luan rol edhe në aferën e Ibizas.
