Pas zgjedhjes së kryetarit dhe nënkryetarit të Akademisë së Shkencave, ka reaguar sërish Fuga.
Akademiku ka propozuar që kryetari të dorëhiqet dhe zgjedhjet të shpallen të pavlefshme.
“Nuk mund të rizgjidhet një kryesi e cila është përgjegjëse e vetme dhe e plotë prej një dekade për kalbëzimin dhe stanjacionin e atij institucioni. Ka penguar reformimin e brendshëm të Akademisë, ka penguar mendimin alternativ. Dorëheqja ose ngrirja nga funksionet e kryesisë është i vetmi hap që do ta çlirojë Akademinë nga modeli i vjetër. Kryesia e zgjedhur sot me shpejtësi, ka vetëm një rrugë të arsyeshme, të japë dorëheqje, të ngrijë funksionet, derisa Asambleja të ketë ngritur një komision për të bërë reformimin dhe më pas thërritjen e Asamblesë për zgjedhje të përgjithshme.
Zgjedhjet të shpallen të pavlefshme dhe kryesia të ngrijë funksionet për të bërë reformimin e Akademisë”, u shpreh Fuga në një lidhje telefonike me Report TV.
Gjithashtu, Fuga komentoi deklaratën e Ramës për ndërprerjen e financimit, teksa tha se Akademia nuk do funksiononte pa fondet e buxhetit të shtetit.
“Ndërhyrja e sotme e zotit Rama, vjen në vijim të ndërhyrjeve kritike të shumë profesorëve të tjerë, edhe zëra të tjerë kanë kërkuar rinovim të ASH. Situata është e tillë, Akademia jep produktin në këmbim të buxhetit të shtetit. Dhe kur buxheti nuk alokohet, Akademia nuk mund të funksionojë”, tha ai.
Më tej, në një lidhje telefonike me News24, akademiku ka zbuluar letrën që i ka dërguar kryeministrit Edi Rama në lidhje me zgjedhjet në Akademinë e Shkencave, si dhe shprehu mendimin e tij në lidhje me prerjen e fondit nga kryeministri:
“Unë i kam shkruar një letër Ramës dhe i kam thënë ju po alokoni fonde për një projekt fiktiv. Akademikët nuk kanë qenë të përgatitur për reagimin e z.Rama. Sot dhe nesër ata do jenë në proces reflektimi, kur shoqëria nëpërmjet zërit të saj do kritikojë. Rama do ta ketë pjekurinë t’i lërë Akademisë disa ditë kohë të reflektojë këtë gjendje të re. Midis akademikëve ka potenciale, që po të çlirohen nga presionet, do të mund të kontribuojnë.
Ka një bazë etike dhe është në kushtetutën e vendit dhe në rregullat e një shoqërie. Buxheti i shtetit alokohet kundrejt një produkti. Nëse ky njeri nuk bën punën e vet, i ndërpritet paga. Ashtu duhet t’i thotë çdo institucioni të kalbur, që s’duhet të të paguaj. Rama është i detyruar ta bëjë,” tha Fuga.
