Organizimi i zgjedhjeve lokale, të cilat do të mbahen më 22 tetor në Kosovë, pritet t’i kushtojë buxhetit të shtetit të paktën 6 milionë euro.
Sipas zyrtarëve të Komisionit Qendror të Zgjedhjeve (KQZ), kjo është një shifër e përafërt, ndërsa kostoja e saktë totale mund të bëhet e ditur tek pas përfundimit të procesit.
Megjithatë, duke pasur parasysh se në zgjedhjet e kaluara nga 38 komuna, 25 shkuan në balotazh, llogaritet se kostoja e zgjedhjeve mund ta kapë shifrën prej 10 milionë eurosh.
Nga ana tjetër, përfaqësues të shoqërisë civile konsiderojnë se përpos buxhetit të shtetit partitë financohen edhe në mënyra joligjore gjatë fushatave, ndonëse përfaqësuesit e subjekteve politike thonë se janë transparentë sa i përket kësaj çështjeje.
