Një ditë pas shkarkimit nga detyra nga KPA të Kryeprokurores së Tiranës, Elisabeta Imeraj, KLP ka caktuar sot drejtuesin e përkohshëm për të zëvendësuar postin e saj. Arenc Çela është zgjedhur në këtë detyrë, në vend të Elisabeta Imerajt.
Dje avokati i huaj i Elisabeta Imerajt, u shpreh i zhgënjyer nga procesi i Vettingut ndaj klientes së saj.
“Unë dua të them se sot është një ditë e trishtë për Shqipërinë. Sot ne vërtetuam se Vettingu është duke shkuar keq, dhe është jashtë kontrollit. Unë nuk kam parë asnjë proces tjetër me prova kaq të fabrikuara. Ju keni humbur një aset shumë të madh”, tha avokati.
Imeraj njihet si prokurorja e dosjeve të forta, dhe për hetimin e grupeve kriminale dhe terroriste që kanë pasur aktivitet në vendin tonë dhe jashtë tij. Ajo bashkë me mbrojtësin e saj premtuan se do të fitojnë mbi këtë vendim, dhe se çështja e saj do të shkojë në Strasburg.
Imeraj u gjend me probleme nga trupa e KPA-së në të tria kriteret e vendosura; probleme të gjitha të argumentuara kundër nga ana e shefes së akuzës së Tiranës.
