Kryeministri Edi Rama ka rrëfyer se si u bind për të mos e shkarkuar Fatmir Xhafajn nga detyra si Ministër i Brendshëm përmes një analize shkencore të kryer nga një agjenci e huaj.
Në një intervistë dhënë për gazetaren e Abc News Mirela Milori në Gjirokastër, kryeministri është pyetur se si u krahasua zëri i Agron Xhafaj nga kjo agjenci me zërin që është në audio-përgjim.
Rama nuk mundi të japë dot shpjegime apo detaje konkrete, por tha se në këtë çështje janë të përfshira “struktura”.
“Është e kotë të insistoj në këtë, sepse në fund të fundit, kjo është fjala e një pale dhe çfarëdo detaji të jap unë, nuk përbën argument për atë që ka dyshime.
Në Vlorë dëshmitari X njihet si një personazh kaq i marrë fund në rrugët e qytetit të kthehet në një hero mediatik. Ka njerëz që e dinë që është farsë, komuniteti në Vlorë e njeh dëshmitarin X dhe janë të skandalizuar si mund të kthehet ky personazh në hero të opozitës, ndërkohë që ka edhe të tjerë që kanë dyshime dhe atyre unë iu them që fjala ime vlen aq sa vlen. Le të presim përfundimin. Çështja do zbardhet. Faji nuk do mbetet jetim” u shpreh Rama, që mohoi të ketë përdorur regjistrimin audio që po përdor prokuroria shqiptare për të bërë të njëjtën analizë, nëse zëri i Agron Xhafajt është në audiopërgjim, ashtu siç pretendon opozita,” deklaroi Rama.
