Galeria Kombëtare e Arteve do të hapë dyert e saj në Natën e Bardhë, ku do të celet ekspozita e re e artistit nga Kosova, Zeni Ballazhi.
Ky i fundit, në koleksionin “Pa titull” përpiqet që nëpërmjet artit të rindërtojë shpirtërisht unitetin e njeriut, t’i rijapë atij energji dhe tension, për të transformuar raportin e tij personal me botën.
“Koncepti i artit përqaset me nevojën për të futur të gjithë elementet e gjallë në raport me botën dhe komunikimin ndërmjet tyre, pa privilegjuar asnjë”, shprehet Ballazhi.
Ekspozita do të hapet në orën 18:00, ndërsa më 29 nëntor publiku do të ketë mundësi të vizitojë të gjitha sallat e Galerisë Kombëtare të Arteve, siç është linja muzeale me krijimtarinë e artistëve të traditës si: Kol Indromeno, Simon Rrota, Ndoc Martini, Spiro Xega, Zef Kolombi, Vangjush Mio, si dhe tablotë me vepra të artit të propagandës komuniste që u realizuan në Shqipëri nga viti 1944-1990.
