Presidenti i Ukrainës, Volodymyr Zelensky, ka akuzuar Rusinë se po përpiqet të fshehë provat e krimeve të luftës të kryera nga trupat e saj në zonat e pushtuara.
Zelensky, i cili do t’i drejtohet një takimi urgjent të Këshillit të Sigurimit të Kombeve të Bashkuara të martën, akuzoi regjimin e Vladimir Putin për ngritjen e një operacioni “propagande” për të hedhur dyshime mbi raportet se civilët ukrainas janë vrarë nga forcat e tij.
“Ne gjithashtu duhet të jemi të vetëdijshëm, se pas vrasjeve masive të zbuluara të civilëve në rajonin e Kievit, pushtuesit mund të kenë një qëndrim të ndryshëm ndaj krimeve të tyre në një pjesë tjetër të vendit tonë ku ata erdhën”, tha udhëheqësi ukrainas.
“Ata tashmë kanë nisur një fushatë të rreme për të fshehur fajin e tyre për vrasjet masive të civilëve në Mariupol. Ata do të bëjnë dhjetëra intervista në skenë, do të rieditojnë regjistrime dhe do të vrasin njerëz në mënyrë specifike për t’u dukur sikur janë vrarë nga dikush tjetër”.
“Ata përdorën të njëjtat taktika kur pushtuesit rrëzuan një Boeing malajzian mbi Donbas. Ata fajësuan Ukrainën. Madje ata dolën me teori të ndryshme konspirative. Madje shkuan aq larg sa pretenduan se kufomat ishin “hedhur” në bordin e avionit më parë”, shtoi ai.
Presidenti u bëri thirrje udhëheqësve perëndimorë që të vendosin sanksione të mëtejshme ndaj regjimit të Vladimir Putin, duke thënë se dënimet “më në fund duhet të jenë të fuqishme”.
Burimi i lajmit: BBC. Përshtatur nga Tirana Today
