Zegjine Çaushi humbi për disa orë mandatin e deputetes pas përfundimit të rinumërimit të votave për Qarkun e Fierit.
Por në orët e mbrëmjes, kandidatja fituese Maldrita Bardho njoftoi se nuk do ta pranonte mandatin pavarësisht se kishte marrë 10 vota më shumë se Çaushi. Gjithcka u paralajmërua nga drejtuesja politike e qarkut Belinda Balluku e cila në një prononcim për BIRN, la të kuptohej qartë se profili që i intereson Edi Ramës për ta çuar në Parlament është pikërisht Zeqine Çaushi.
Procesi i rinumërimit, në qarkun e Fierit solli ndryshime në shpërndarjen e mandateve brenda kampit socialist. Zeqine Çaushi, fillimisht humbi mandatin e deputetes në qarkun e Fierit, i cili i kaloi për disa orë kandidatës tjetër, në listën e hapur të partisë socialiste, Maldrita Bardho. Ashtu siç pritej, diferenca e ngushtë mes dy kandidateve solli një rrokadë, në listat e socialistëve pasi nga procesi i rinumërimit, rezultoi se Zeqine Çaushi kishte përfituar 48 vota që nuk i takonin. Por gjithcka ndryshoi në orët e mbrëmjes. Në mënyrë të papritur deputetja që rezultoi fituese pas rinumërimit, Maldrita Bardho njoftoi përmes një postimi në rrjetet sociale se e refuzonte mandatin e deputetes në favor të Zeqine Çaushit.
Do t’i lë me shumë kënaqësi vendin tim, koleges dhe mikes time, Zeqine Çaushi, Zeqinesë që ka luftuar ndoshta më shumë për skuadrën se sa për veten këtë fushatë.
Megjithatë ky akt i deputetes fituese pas rinumërimit Maldrita Bardho, duket se nuk është bërë me vullnetin e saj. Rezultati që doli nga rinumërimi nuk i ka pëlqyer drejtueses së gjithpushtetshme politike të Partisë Socialiste në Qarkun e Fierit, zv.kryeministres Belinda Balluku. Në një prononcim për rrjetin BIRN, Balluku la të kuptohej qartë që kandidatja e preferuar e saj dhe e kryetarit Rama për të qenë në Parlament është Zeqine Çaushi dhe jo Maldrita Bardho.
Rasti i 10 votave diferencë mes Maldrita Bardhos dhe Zeqine Çaushit, sigurisht do të jetë një çështje që do të mbetet në diskrecionin e plotë të kandidateve për të proceduar më tej.
Pak orë pas kësaj deklarate të Belinda Ballukut, Maldrita Bardho refuzoi mandatin. Duket qartë se një personazh si Zeqineja është profili i preferuar i Edi Ramës për t’i humbur çdo lloj serioziteti sallës më të rëndësishme politike të vendit, të cilën Edi Rama e frekuenton 1 herë në 6 muaj, dhe në funksion të këtij plani, shefi i qeverisë përmbysi edhe vullnetin e votuesve të Partisë së tij të cilët kishin votuar për një kandidate tjetër. Nga ana tjetër rinumërimi i kutive të qarkut të Fierit, dëshmoi trafikimin e fortë të votave brenda kampit të Partisë Socialiste, ku kampion për përvetësimin e votave doli Ceno Klosi, i cili më 11 maj, kishte përfituar 831 vota më shumë se sa i takonin.
