Long Island, në një distance të shkurtër nga qyteti i Nju Jorkut, është në fokusin e zotimit të Presidentit Trump për të zhdukur bandën e njohur si Mara Salvatrucha, ose MS-13. Banda famëkeqe njihet kryesisht për format mizore të vrasjeve, se sa për numrin e të vrarëve. Por në një qytet të prekur nga kjo bandë, banorët janë skeptikë se grupi që vepron në brigjet lindore për pothuajse 40 vjet, mund të zhduket lehtësisht pa dëmtuar komunitetin e madh të imigrantëve.
MS-13 u zgjerua nga Kalifornia në fillim të viteve 90-të për të gjetur strehë në qytezën turistike Freport në zonën Long Island të shtetit të Nju Jorkut.
“Trumpi erdhi në Shtëpinë e Bardhë dhe po bëhet gjithë kjo zhurmë euforike për bandën, kur ka vite që njerëzit po vdesin në duart e MS-13.”
Cory Brewer, i cili u rrit në qytezën Freport, kujton disa vrasje të njohura të bandës MS-13 që nga viti 2000. Në tetor u gjetën mbetjet e viktimës së fundit nga ky qytet në një park aty pranë duke trazuar banorët e kontesë Nasau. Patrik Ryder drejton departamentin e policisë në kontenë Nasau.
“Një vit më parë MS-13 vrau 6 të rinj në kontenë Nasau. Njëri nga viktimat u qëllua në fytyrë, tjetri pas koke, ndërsa katër të tjerët u therën me hanxharë. Ata i groposën në varre të cekëta në të gjithë qarkun.”
Në një takim pune me zyrtarët e shtetit të Nju Jorkut në Long Island, Presidenti Trump përdori për herë të tretë gjatë një jave një frazë të debatueshme ndaj pjestarëve të bandës MS-13.
“Ata nuk janë njerëz, por kafshë. Ndaj ne duhet të jemi shumë, shumë të ashpër.”
Mbështetësit në Long Island thonë se janë të shqetësuar për lagjet fqinje imigrante që zakonisht kanë qënë objekt dhune edhe pse mund të mos jenë të frikësuar për veten e tyre. Patricia Dwyer jeton në Long Island.
“Vijnë këtu me mendimin se janë të sigurtë dhe do të punojnë e të marrin shtetësinë. Banda po terrorizon komunitetet e veta. Emigrantët nuk kanë ardhur këtu që të përjetojnë të njëtat gjëra si në vendin nga erdhën. Amerika nuk është kështu.”
Të tjerët vënë në pikpyetje sinqeritetin e qëllimit të zotit Trump për të siguruar komunitetet e tyre. Gabriela Andrade është organizuese komuniteti.
“Nuk e kuptoj se përse njerëzit nuk shqetësohen kur flitet për vrasje. Mos ka të bëjë me racën? Më duket se po. A është sepse ne jemi latinë dhe kemi lëkurë ngjyrë kafe?”
Në qytezën Freport, disa banorë mbetën skeptikë rreth zgjidhjes së situatës nga presidenti, ose të paktën pa shkaktuar dëme tek komuniteti më i madh. Dave Pinero banon në Long Iland.
“Nëse arrin diçka, pastë bekimin e Zotit. Por nuk e di si dikush mund t’i ndalojë këto që ndodhin.”
Një banor tjetër i zonës Long Iland, Cory Brewer thotë se :
“Për mua kjo është një tjetër mënyrë për të justifikuar ndërhyrjen në privacinë e të tjerëve. Të shikosh mundësinë nëse mund të dëbosh dikë jashtë vendi.”
Javier Lechuga nga Kolumbia ka 26 vjet që banon në Freport. Ai argumenton se vitet e fundit MS-13 është bërë më pak e rrezikshme brenda qytezës. Një lehtësim për babain e një 17 vjeçari. Ai e mirëpret idenë e zhdukjes së bandës.
“Kur imigrantët bëjnë gjëra të këqija, mendoj se çdo shtet merr masa. Nuk mendoj se Amerika bën përjashtim.”
Por Javier Lechuga shtron pyetjen se si mund të zhduket një grup i dhunshëm pa dëmtuar popullsinë hispanike që zbaton ligjin, siç është familja e tij. Ai e sheh djalin e tij si shembull suksesi që vjen nga familjet emigrante punëtore, voa.
“Djali im është i dalluar në shkollë. Një çertifikatë nderi mban nënshkrimin e Presidentit Trump. Kjo më bën krenar sepse po të flitet për komunitetin tim, djali im është shembull i së mirës dhe jo reputacionit që nganjëherë u atribuohet imigrantëve.”
Zoti Lechuga thotë se edhe të tjerë ndajnë mendim të ngjashëm për të kontribuar në shoqëri. Ndërsa ata që nuk shkëlqejnë në shkollë, thotë ai, ajo që shpesh kanë nevojë, është ndihma.
