Drejtues të lartë të grupimit socialdemokrat evropian kanë nxjerrë një skemë sesi mund të anëtarësohet sa më shpejt Shqipëria në Bashkimin Evropian.
Për këtë arsye, Hannes Swoboda dhe Maria Eleni Koppa të dy përfaqësues të këtij grupimi politik në Parlamentin Evropian kanë ndërtuar një plan sesi mund të përshpjetohet procesi i anëtarësimit të vendeve të Ballkanit Perëndimor dhe vetë Shqipërisë. 
Në një analizë për revistën e Këshillit të Marrëdhënieve me Jashtë, dy përfaqësuesit e grupimit socialdemokrat paraqesin tre hapa përmes të cilave duhet të funksionojë hapja e negociatave dhe vetë integrimi në BE i Shqipërisë.
“Ajo që ne propozojmë, është një qasje me tre hapa si një kornizë për një afrim ndërmjet BE-së dhe vendeve të Ballkanit Perëndimor – paralel me negociatat dypalëshe të pranimit, të cilat do të vazhdojnë të jenë të bazuara mbi meritat e veçanta të secilit vend kandidat”, shkruajnë Hannes Swoboda dhe Maria Eleni.
Hapi i parë
Të krijohet një Union në fushën e sigurisë. S’ka dyshim që rajoni përballet me sfida serioze në nivelin e sigurisë: Krimi i organizuar, trafiqet, droga, ekstremizmi fetar, emigrimi ilegal.
Ajo çka nevojitet është një kuadër efikas bashkëpunimi institucional mbi çështjet e sigurisë, në formën e një komuniteti të sigurisë BE-Ballkan. Kjo përfundimisht duhet të çojë në një union të sigurisë. Deri në zgjidhjen përfundimtare të çështjes së statusit, Kosova mund të ketë statusin e vëzhgueses.
Pjesëmarrja në këtë komunitet të sigurisë, mund të fillojë menjëherë. Është emergjente përmbushja e shqetësimeve të sigurisë të qytetarëve të shumë vendeve anëtare të BE-së, dhe vendeve të Ballkanit Perëndimor.
Hapi i dytë
Pjesëmarrja në fondet strukturore. Masa e parë do të jetë shndërrimi i procesit të Berlinit në një proces të BE-së, dhe integrimin e saj në strategjinë e para-aderimit, me një rol të veçantë për Komisionin Evropian.
Kjo do të ishte një qasje që synon të adresojë çështjet ekonomike në vendet e Ballkanit Perëndimor, dhe mund të jetë një nxitës i bashkëpunimit ekonomik rajonal, rritjes dhe qëndrueshmërisë.
Hapja e negociatave duhet të jetë parakushti bazë, por pjesëmarrja në fondet strukturore duhet gjithashtu të kushtëzohet me përparimin e prekshëm në sundimin e ligjit dhe në fusha të tjera specifike, veçanërisht kur një përparim i tillë rezulton në thellimin e bashkëpunimit rajonal.
Hapi i tretë
Statusi i vëzhguesve në mbledhjet e Këshillit. Pas mbylljes së kapitujve 23 dhe 24, vendet kandidate mund të marrin statusin e vëzhguesit në mbledhjet zyrtare dhe jo-zyrtare të Këshillit Evropian, veçanërisht në fushat e drejtësisë dhe punëve të brendshme, politikës së jashtme dhe mbrojtjes, energjisë dhe politikës sociale.
LEXO EDHE:
Një qasje e re për zgjerimin e BE-së në Ballkanin Perëndimor
Sipas këtyre propozimeve, synohet “prodhimi i rezultateve konkrete për Ballkanin Perëndimor, duke ofruar përparësi të prekshme për vendet e rajonit, gjatë gjithë periudhës së proceseve të tyre të negociatave, duke promovuar kështu stabilitetin dhe bashkëpunimin rajonal. Kjo është në interesin e rajonit, por edhe të projektit evropian”.
TIRANA TODAY
