Një nga bombarduesit e Sri Lankës quhet Abdul Lathief Jameel Mohamed dhe ka studiuar në Angli në vitin 2006-2007. Sipas BBC, ai studio në jug-lindje të Anglisë, por nuk e përfundoi diplomën e universitetit. Më pas, sulmuesi bëri një kurs në Australi.
Tashmë numri i viktimave ka mbërritur në 359 me më shumë se 500 njerëz të plagosur. Kryeministri i Sri Lankës, Ranil Wickremesinghe ka thënë se ISIS mund të ketë gisht në shpërthimet. ISIS ka thënë se ka kryer sulmet, të cilat synonin kishat dhe hotelet, megjithëse nuk ofroi dëshmi direkte për përfshirjen e saj.
Zëvendësministri i Mbrojtjes i Sri Lankës, Ruwan Wijewardene tha se sulmuesi kishte vazhduar të bënte “postdiplomën e tij në Australi përpara se të kthehej për t’u vendosur në Sri Lankë”.
Sulmuesi thuhet se ishte rreth të tridhjetave. Po ashtu, zv.ministri tha se shumica e sulmuesve “ishin të mirëarsimuar dhe vijnë nga familje të klasës së mesme, apo më të lartë”.
“Ata janë financiarisht mjaft të pavarur dhe familjet e tyre janë mjaft të qëndrueshme financiarisht”, tha ai.
Dy prej sulmuesve thuhet se janë vëllezër dhe djemtë e një tregtari të pasur në Colombo, kryeqytetin e Sri Lankës./ Tirana Today
