Kryefjala e ditëve të fundit ka qënë Xhisiela, e cila është kthyer në personazh. Komentet kanë qenë të ndryshme, e interesi është shtuar mbrëmjen e djeshme, pas dhënies së dy intervistave. Ajo ka mohuar të gjitha dëshmitë e publikuara deri tani, nga dokumentet zyrtare të policisë se është dhunuar nga ish-i dashuri i saj, Rexhep Rraja, djali i deputetit të PS, Rrahman Rraja.
Shumë prej ndjekësve në rrjetet sociale e lidhën ngushtësisht me faktin se 25-vjeçarja është ndjerë e trembur dhe në presion. Në morinë e shumë komenteve e statuseve, është edhe ai i gazetarit Dritan Laci, ku ka përshkruar në detaje prezantimin me Xhisielën në ‘Opinion’, pas kuintave të emisionit.
Që në prezantimin e parë, atij i kanë bërë përshtypje disa detaje, për të cilët ndoshta nuk do i kishim dhënë rëndësi. Ai shkruan në Facebook se Xhisiela i kishte dhënë rëndësi emisionit, dhe shfaqja e saj, në mënyrën skenike ishte e arritur. Ajo mbante po ashtu edhe një celular të shtrenjtë.
Gazetari kishte arritur në përfundimin se Xhisiela ishte një vajzë që e pëlqente dhe e kërkonte jetën e mirë. Po kështu ai kishte pikasur se ajo përpiqej që të jepte përshtypjen e lirshmërisë së një vajze të shpenguar, por për fat të keq, sytë e tradhtonin sa herë gjendej përballë interesimit mbi lidhjen sentimentale me Rexhep Rrajën.
