Ish-presidenti amerikan, George Herbert Walker Bush u nda nga jeta më 30 nëntor, në shtëpinë e tij në Teksas, në moshën 94-vjeçare.
James A Baker III, mik i ish-presidentit ka dhënë detaje për momentet e fundit të Bush. Duke folur për New York Times, ish-sekretari i shtetit tha se 94-vjeçari ishte duke u “venitur” gjatë javës së fundit, pasi shumicën e kohës e kalonte duke fjetur, duke mos ngrënë dhe pa u çuar nga shtrati.
Baker tha se edhe pse ish-presidenti ishte një njeri që e kishte sfiduar vdekjen disa herë gjatë viteve, këtë herë ndjehej ndryshe. Mësohet se ish-sekretari kishte ndaluar të premten në shtëpinë e Bushit, për të kontrolluar shokun e tij të vjetër, ose ndoshta edhe për t’i thënë lamtumirë.
Sapo ai hyri në dhomë, Bush filloi të pyeste:
“Ku po shkojmë, Baker?”
Baker iu përgjigj:
“Ne po shkojmë në qiell ».
Më pas, Bush tha:
“Aty dua të shkoj.”
94-vjeçari ndërroi jetë brenda 13 orësh. Sipas mediave të huaja, fjalët e tij të fundit ishin « Edhe unë të dua shumë », drejtuar të birit George W.Bush gjatë një telefonate, teksa ai i kishte thënë se ishte një baba i mrekullueshëm dhe se e donte shumë.
