Komisioni i Pavarur i Kualifikimit ka zbardhur vendimin për të ndërprerë procesin e rivlerësimit kalimtar për ish Kryeprokurorin Adriatik Llalla. Ky vendim vjen pas deklaratës së Llallës se nuk do të merrte një post në Gjykatën e Apelit.
Në vendim thuhet se vettingu për Llallën ndërpritet pasi ai dha dorëheqjen, kësisoj ish-kryeprokurori humb të drejtën për të qenë gjyqtar ose prokuror për 15 vite. Ndaj këtij vendimi lejohet ankimim në Kolegjin e Posaçëm të Apelimit brenda 15 ditësh.
“Ndërprerja e procesit te rivlerësimit për shkak te dorëheqjes se subjektit te rivlerësimit sjell si pasoje përfundimin e kësaj procedure administrative dhe si rrjedhoje ai humbet te drejtën për t’u emëruar gjyqtar ose prokuror i çdo niveli, anëtar i Këshillit te Larte Gjyqësor ose i Këshillit te Larte te Prokurorisë, Inspektor i Larte i Drejtësisë ose Prokuror i Përgjithshëm për një periudhe 15-vjeçare, sipas parashikimeve te pikës 2 te nenit “G” te Aneksit Kushtetues”, thuhet ndër të tjera në vendimin e arsyetuar të tre anëtarëve të trupës gjykuese.
Shkresa e publikuar nga KPK mban firmën e tre anëtarëve të trupës gjykuese, Roland Ilia kryesues si dhe Pamela Qirko dhe Olsi Komici anëtarë.
