Zbardhen shkaqet që çuan në vetëvrasjen e ish-futbollistit korçar, Gjergji Kushe, i cili u hodh dje nga kati i katërt i një pallati në qendër të qytetit.
Kushe ka lënë një letër, ku shpjegon se borxhet dhe faturat e papaguara duket se e kanë shtyrë drejt vetëflijimit sportistin dhe trajnerin e njohur.
Letra e lënë për të afërmit e tij, u gjet nga policia në banesë.
“Nuk e përballoj dot më këtë gjendje, më kuptoni. Çdo ditë e vuaj gjendjen në të cilën ndodhem, me faturat e papaguara dhe disa borxhe, ndaj nuk dua të jetoj më. E kam menduar gjatë dhe e kam vendosur…”, shkrihej në letrën që iu gjet në banesë, raporton BalkanWeb.
Sapo ka shkruar këtë letër, 59 vjeçari është hedhur në drejtim të rrugës kryesore nga një lartësi mbi 15 metrash, duke gjetur vdekjen e menjëhershme.
Dëshmitarë të ngjarjes së rëndë kanë kërkuar ndihmën e ambulancës dhe policisë, por sportisti ka gjetur menjëherë vdekjen.
Edhe pse përgjatë vitit të fundit kishte nisur betejën me alkoolin, gjendja e tij psikologjike ishte rënduar së tepërmi. Pas vitit 2012 Kushe e kishte pasur të pamundur të vazhdonte punën si trajner, por edhe mësues i edukimit fizik për shkak të problemeve shëndetësore të lindura si pasojë e konsumit të alkoolit ndërsa trajtohej me KEMP.
59-vjeçari jetonte i vetëm në apartamentin e tij pas vdekjes së nënës ndërkohë që sipas të njohurve të tij kohët e fundit ishte në një gjendje tepër të rënduar psikologjike.
Në moshën 18 vjeçare Kushe arriti fitojë titullin “Kampion” me Vllazninë, vazhdoi një karrierë të gjatë sportive duke punuar me parë me të rinjtë, e më tej duke u kthyer në një prej trajnerëve më të njohur të portierëve të “Skënderbeut”.
