Gazetari Basir Çollaku ka publikuar sot të tjera përgjime në lidhje me Habilajt, grupin e trafikut të drogës të hetuar nga antimafia italiane dhe që ka dyshime për lidhje me ish-ministrin e Brendshëm, Sajmir Tahiri. Në përgjime dëgjohet për trafikantët që flasin për lumin e parave që hidhen lart për të punuar qetësisht.
“Ej shoku, e di ti se cili është rreziku im? Unë nuk shkoj personalisht të prek ndonjë gjë me dorë, fus lekë për të bërë këtë ”punë”, rrezikojmë lekët, e imagjinon dot se çfarë ndodh?! Doja t’i thoja se pa lekë nuk bëhet gjë…pasi ky donte punë pa lekë…po ti a e di se sa lekë hidhen atje lart për të arritur këtu puna?”, thotë i arrestuari Nezar Seiti, i cili ndodhej në makinën e Habilajt me Maridian Sulajn.
Çollaku publikon një prej dokumenteve të përgjimit ku komenton; “Për çështjen e trafikut të drogës Habilaj-Tahiri-Rama, ka një turr ngjarjesh të prodhuara ta zhbëjnë, mënjanojnë, sepse nëse bie Tahiri, i akuzuar zyrtarisht në këtë çështje merr me vete Ramën. Të arrestuarit flasin hapur mes tyre për lumin e parave që hidhen lartë që të punohet qetësisht dhe bashkërisht poshtë.”
Pjesë e përgjimit: “E di sa para hidhen lart që te punohet…ai as që e ka idenë..” dhe duhen kamionë të shëndetshme me tre motorra me nga 25 mije euro, vetëm motorrat e gomones 75 mije euro, kjo është pjesë e depozituar në gjykatë nga prokuroria.
Saimir Tahiri, ish-ministri i Punëve të Brendshme është nën hetim nga Prokuroria për Krime të Rënda.
