Detaje të reja kanë dalë në dritë sa i takon rastit “Xhisiela”. Është gazetari Trashgim Sokolaj, i cili ka zbuluar disa detaje interesante, lidhur me këtë çështje, e cila po merr një tjetër rrjedhë.
Ai tha në emisionin “Arena” në “Ora News”, se Xhisiela Maloku është marrë 7 herë në pyetje nga Prokuroria, dhe në të gjitha rastet, ka pasur ndryshime të qëndrimeve të saj.
Për rrjedhojë, duke investiguar të gjitha këto raste, grupi i hetimit ka kuptuar se me dëshminë e kësaj vajze nuk mund të shkonte në Gjykatë, duke akuzuar një person për dhunë.
“Në dijeninë time, pasi procesi ka shkuar në Prokurori, është vendosur në një shinë ligjore. Vajza përpara se të jepte intervistat, është pyetur 7 herë në Prokurori, dhe në secilën prej këtyre dëshmive vajza harron elementë të caktuar, dhe shton elementë të tjerë. Në të gjitha këto raste, grupi i hetimit ka kuptuar se me dëshminë e kësaj vajze, nuk mund të shkonte në Gjykatë duke akuzuar një person për dhunë.
Është bërë e domosdoshme që hetimi të orientohet përtej dëshmive të saj, me mbikëqyrjen e kamerave, me mbikëqyrjen e automjetit, me mbikëqyrjen e banesës, me sekuestrimin e telefonave celularë, me përgjimin ambiental që është bërë në policinë e Krujës, me komunikimet në rrjetin social në Instagram, ku intensiteti ka qenë dhe pas publikimit të rastit që Xhisiela ka komunikuar me personin në fjalë dhe të gjitha këto. Ajo që më kanë konfirmuar ditët e fundit nga Prokuroria, është që ndryshimi i deklarimeve të Xhisielës, nuk sjell asnjë lloj ndryshimi në hetimin e rastit dhe përfaqësimin në gjyq. Dosja do të dërgohet në gjykatë brenda pak ditësh”.
